“Иргэн төвтэй төрийн үйлчилгээ 2019” аймгийн зөвлөгөөний үеэр Орхон аймгийн төрийн байгууллагуудын дунд мэдээлэл солилцооны “E-Office” програм нэвтрүүлсэнийг ЗГХЭГ-ын дэд дарга У.Бямбасүрэн сайшаалаа.
Тус програм нь төрийн 80 гаруй байгууллагыг холбосон бөгөөд аймгийн Засаг даргын захирамж, албан бичиг, албан тоот, хүсэлт зэргийг цахимаар илгээж, шийдвэрлэлт, үр дүнгийн талаар богино хугацаанд мэдээллээ солилцох боломжтой юм.
Монгол Улсын Засгийн газраас 2019 оныг “Иргэн төвтэй төрийн үйлчилгээний жил” болгосонтой холбоотойгоор Орхон аймгийн ЗДТГ-аас үүнд чиглэсэн төлөвлөгөө боловсруулан ажиллаж байна. Тухайлбал, иргэдийн хэрэгцээнд суурилсан төрийн үйлчилгээ, ил тод байдал, иргэдийн оролцоотой шийдвэр гаргах, төрийн үйлчилгээний оновчтой чиг үүргийг бий болгох, үр дүнд суурилсан удирдлага, иргэн төвтэй төрийн алба гэсэн таван зорилт дэвшүүлэн ажиллаж байна.
Үүний хүрээнд Татварын хэлтэс, татварын тайлан, мэдээлэл, татварын илүү төлөлт, татварын төрлөөр бүртгүүлэх зэрэг олон үйлчилгээг онлайнаар явуулж байна.
Хөдөлмөр халамжийн үйлчилгээний газар “дохионы хэлний хэлмэрч”-ийг төрийн байгууллагуудад ажиллуулахаар бэлтгэж байгаа бол Өрхийн эрүүл мэндийн төв нь 8-10 төрлийн шинжилгээ авч ахмад настаныг өрх гэр болон төв дээрээ өдрийн эмчилгээ хийх зэрэг ажлыг хэрэгжүүлж байна.
